Til forsvar for Fri programvare - NUUGs prosesskriv i DNS-beslagsanke

[aktive at nuug.no]

Følgende ble nettopp publisert på NUUGs blogg,
https://www.nuug.no/news/, og gjengis her slik at alle i NUUG-miljøet er
kjent med status og planen om rettsmøte neste onsdag.

https://www.nuug.no/news/Til_forsvar_for_Fri_programvare___NUUGs_prosesskriv_i_DNS_beslagsanke.shtml

Til forsvar for Fri programvare - NUUGs prosesskriv i DNS-beslagsanke
=====================================================================

Som oppfølging til anken i DNS-beslagsaken[1] gikk NUUGs prosessskriv i
posten i går, på dagen året etter at DNS-navnet ble beslaglagt av
politiet. Vi håper argumentene om hvorfor NUUG har engasjert seg i dette
er forståelig også for de som ikke har satt seg inn i saken. Hvis du
synes arbeidet NUUG gjør her er viktig, så er det svært verdifullt om du
støtter oss økonomisk[2] slik at vi klarer å føre saken helt til siste
konklusjon.

 [1] http://www.nuug.no/news/Her_er_v_r_anke_av_Tingrettens_DNS_beslagskjennelse.shtml
 [2] https://www.nuug.no/dns-beslag-donasjon.shtml

  Saka gjeld: Anke over Follo tingretts orskurd om beslag av DNS-domenet
  «popcorn-time.no».

  1. PROSESSUELT

  Norwegian Unix User Group (NUUG) erklærer med dette partshjelp for
  IMCASREG8 og Internet Marketing Consults AS, jf. tvisteloven § 15-7
  (b) og HR-2014-947-U. NUUG var også partshjelpar i tingretten, utan
  protest frå Økokrim.

  NUUG ønskjer at det blir halde munnleg forhandling i medhald av
  straffeprosessloven § 387, 1. ledd. Det er heilt sentralt for sakas
  opplysning at programvara Popcorn Time vert demonstrert i retten, for
  å illustrere at lovleg bruk er fullt mogleg.

  Det bes om løyve til at underteikna kan opptre som prosessfullmektig
  for NUUG i lagmannsretten, jf. domstolsloven § 223, 1. ledd.

  Det opplysast om at separat prosesskriv vil bli inngitt av Elektronisk
  Forpost Norge.

  1.1. Grunnlaget for partshjelpa

  NUUG er ei ikkje-kommersiell foreining som arbeider for spreiing av
  UNIX-liknande system, fri programvare og opne standardar i Noreg.
  Foreininga blei danna i 1984 med det formål å auke interessa for bruk
  av UNIX, og å stimulere til utveksling av informasjon og erfaring
  mellom brukarar. NUUG er den norske greina av den internasjonale
  organisasjonen USENIX («The Advanced Computing Systems
  Association»). NUUG har i dag totalt 241 medlemmer. NUUG vert
  representert ved og dagleg drifta av eit styre beståande av fem
  medlemmer.

  Bilag 1: [22]Norwegian Unix User Groups vedtekter[3].
  
 [3] https://www.nuug.no/vedtekter.shtml

  Beslaget i denne saka bidreg til utryggleik blant medlemma i NUUG om
  kva som lovleg kan publiserast utan å risikere beslag og
  strafferettsleg forfølging. Dette gjeld særleg sidan eit hovudpoeng
  med fri programvare er deling, og det at det blir drive mykje
  frivillig informasjons- og rettleiingsverksemd i regi av NUUG og
  medlemma. Eit beslag som nettopp er grunngjeve i at slik
  informasjonsverksemd utgjer straffbar medverking, grip direkte inn i
  foreininga sitt formål og naturlege verkeområde.

  Programvare som Popcorn Time er såkalla «fri programvare». Fri
  programvare, eller open kjeldekode som det også vert kalla, inneber at
  ein har høve til å endre, forbetre, spreie og dele programvara utan
  hinder av opphavsrett. Det vil seie at ein kan lage nye løysingar
  basert på eksisterande programvare utan at ein må byrje på nytt kvar
  gong. Når ein så byggjer vidare på fri programvare, kan ein dele sin
  endra versjon, som andre så igjen kan studere og vidareutvikle – anten
  for å forbetre produktet til nytte for fellesskapet, eller for å
  tilpasse produktet til sin bruk. Fri programvare inneber også at ein
  kan reparere programvare sjølv dersom ein finn feil, på same måte som
  ein kan reparere andre eigendeler. Det er dette som skil fri
  programvare frå lisensiert programvare, der ein berre får lov til å
  bruke programvara, utan å ha høve til å endre eller forbetre den,
  verken til eigen eller fellesskapets nytte.

  Eit eksempel på vellukka bruka av fri programvare, er Linux, som
  brukast i fleirtalet av verdas smarttelefoner. Den mest kjente
  varianten er Android. Eit anna eksempel er LibreOffice, som er basert
  på OpenOffice og er eit mykje brukt alternativ til Microsoft Office.

  Bilag 2: [23]Informasjonfolder om fri programvare utarbeida av NUUG[4]
  
 [4] http://www.nuug.no/dokumenter/folder-friprogramvare.pdf

  At NUUG er tilhengjarar av fri programvare, inneber likevel ikkje at
  dei er motstandarar av opphavsrett generelt eller støttar slik bruk av
  Popcorn Time som utgjer krenking av opphavsrett. Sjølv om Popcorn Time
  også kan brukast til å spreie opphavsrettsbeskytta materiale, er langt
  frå all bruk av Popcorn Time ulovleg. NUUG vil halde fram at å
  beslaglegge DNS-domenet popcorn-time.no er eit ulovleg, uproporsjonalt
  og ueigna tiltak for å motverke ulovleg spreiing av
  opphavsrettsbeskytta materiale. Beslaget er retta mot ei nettside som
  innehaldt informasjon om ei lovleg programvare, som både kan brukast
  og som blir brukt til lovlege formål. Nettsida åtvara også brukarane
  om at nokon former for bruk av Popcorn Time kunne medføre brot på
  opphavsrett. På popcorn-time.no var det vidare informasjon om «Butter
  Project», som er ein modifikasjon av Popcorn Time som berre gjer
  oppslag i fri-lisensierte innhaldskatalogar som vodo.net, archive.org
  og CCC Media. Denne modifikasjonen av Popcorn Time illustrerer etter
  NUUG si oppfatning godt nytta av fri programvare.  NUUG ser det som
  eit paradoks at Økokrim vel å ta beslag i ei nettside som faktisk
  informerer i korleis programvare kan brukast til å unngå krenkingar av
  opphavsretten.

  2. BAKGRUNN - FAKTUM

  For å lettare belyse NUUG sine argumenter i saka, meiner vi det er
  hensiktsmessig å gjere greie for faktum i noko større grad enn det som
  følgjer av Follo tingretts orskurd og Økokrims avgjersle om beslag.

  2.1. Teknologien - begreper

  Av omsyn til sakas opplysing finn vi det hensiktsmessig å gjere nokre
  begrepsavklaringer.

  Programvara Popcorn Time kombinerer tre teknologier – nemleg
  Bittorrent, videoavspeling og oppslag i katalogtjenester.

  Bittorrent er eit «peer to peer»-system for å distribuere datafiler i
  eit nettverk. Det fungerer slik at kvar deltaker i nettverket både er
  mottaker og videredeler av filer, noko som bidreg til effektiv
  distribusjon og utnytting av bandbredde. For å bruke
  Bittorrent-teknologi treng brukaren ein «bittorrent-klient». Det finns
  mange forskjellige bittorrent-klienter for dei aller fleste
  datasystem. Popcorn Time har slik funksjonalitet integrert, det same
  har den norske nettlesaren Opera.

  Popcorn-Time.io, Butter og deira variantar som alle går under
  samlenemninga Popcorn Time, får innhald frå kjelder som gjerne kallast
  katalogar. . Katalogane inneheld metadata, som peikar brukaren vidare
  til der ein kan laste ned materiale frå.

  2.2. Popcorn-time.no og Popcorn Time

  Popcorn-time.no var domenenamnet til ei nettside som ga informasjon om
  programvara Popcorn Time i ulike variantar. Nettsida lenka også til
  andre nettsider der programvara kunne lastast ned. Det er mogleg å
  strømme opphavsrettsbeskytta innhald gjennom noko av dei programma som
  går under namnet Popcorn Time, men sjølve programvara er ikkje
  ulovleg. Som nemnd over, er også mykje fritt innhald tilgjengeleg,
  blant anna under såkalla «Creative Commons»-lisensar. Teknologien som
  brukast i Popcorn Time er BitTorrent-protokollen.

  Innehavar av popcorn-time.no var også bevisst på at programvara kunne
  misbrukast, og tok aktive skritt mot å hindre misbruk blant anna ved
  at følgjande tekst var tydeleg på hovudsida:

    Før du fortsetter, bør du være klar over at bruk av Popcorn Time og
    lignende kan være ulovlig. Mye av innholdet i disse tjenestene er
    opphavsrettsbeskyttet materiale som deles og lastet ned uten
    tillatelse fra eierne og produsenter av materialet. Bruk av disse
    tjenestene vil ofte resultere i et brudd på opphavsrett, avhengig av
    hva du ser. Hvis du likevel velger å bruke tjenestene du lese om på
    dette området, gjør du det på egen risiko, og det anbefales å følge
    loven.

  3. MEDVERKING

  3.1. Innleiing

  På bakgrunn av faktum og NUUGs kjernesaker som nemnd tidlegare i dette
  skriv, er NUUG særleg bekymra for Økokrims påstand og Follo tingretts
  konklusjon om at det ligg føre straffbar medverking. Vi vil difor
  knytte nokon særlege merknader til denne problemstillinga i det
  følgjande.

  NUUG vil halde fram at det ikkje ligg føre straffbar medverking, og at
  beslaget difor må hevast. Økokrim har grunngjeve beslaget i
  straffeprosesslova § 203 første ledd jf. § 205 første ledd, som angir
  at det kan tas beslag i «ting som antas å kunne inndras».  Økokrim har
  vidare vist til straffeloven § 69, som opnar for inndraging av ting
  som «er frembrakt ved, har vært gjenstand for, eller har vært brukt
  eller bestemt til bruk ved en straffbar handling». Det underliggande
  straffbare forhold i saka er hevda å vere medverking til brot på
  åndsverkloven § 2, jf. § 54 første ledd, jf. tredje ledd,
  jf. straffeloven § 15.

  Straffelova § 15 slår fast at «Et straffebud rammer også den som
  medvirker til overtredelsen, når ikke annet er bestemt». Dei nærmare
  grensene for medverkingsansvaret følgjer av fast og langvarig norsk
  rettspraksis. Den nye straffelova er ikkje meint å endre
  rettstilstanden på dette punkt, jf. Ot.prp. nr 90 (2003-2004), kap.
  30.1 (merknaden til § 15).

  Medverkeransvaret skal ramme personar som, utan sjølv å ha utført den
  aktuelle straffbare handlinga, har utvist det minimum av straffverd
  som ei handling i samsvar gjerningsskildringa krev.

  Før vi drøftar medverking vidare, er det grunn til å presisere kva den
  straffbare handlinga hovudpersonen utfører faktisk består i. Den
  aktuelle straffbare handlinga er tilgjengeleggjering av eksemplar i
  strid med åndsverklova § 2. I praksis skjer tilgjengeleggjeringa ved
  at opprinneleg opplaster gjer ein bittorrent-pakke tilgjengeleg på
  nettet. Deretter må referanse til eller informasjon om
  opphavsrettsbeskytta materiale plasserast i ein katalogtjeneste. Ein
  måte å gjere oppslag i desse katalogtjenestane på, er via programvara
  Popcorn Time. Det er altså ikkje Popcorn Time som gjer materiale
  tilgjengeleg, men den som gjer materiale tilgjengeleg for søk via
  Popcorn Time eller på andre måtar. Ein treng ikkje Popcorn Time for å
  få tilgang til slikt materiale, men kan finne det med ein vanleg
  nettlesar om ein kjenner nettadressa.

  3.2. Eventuell straffbar medverking for Popcorn-time.no

  Den viktigaste rettslege problemstillinga i denne saka er om det
  innehavar av popcorn-time.no har gjort, nemleg å bidra til spreiing av
  ei programvare og å informere om korleis den kan brukast, er nok til å
  slå fast straffbar medverking til brot på åndsverklova § 2.

  Follo tingrett har i sin orskurd grunngjeve konklusjonen om straffbar
  medverking slik:

    Programvaren Popcorn Time gjør filmer og TV-seier tilgjengelig for
    allmennheten uten opphavsmenns samtykke. Nettsiden
    https://popcorn-time.no oppfordret besøkende til å laste ned denne
    programvaren. Nettsiden inneholdt lenker til andre nettsider hvor
    programvaren enkelt kunne lastes ned. I en "disclaimer" ble
    besøkende varslet om at programvaren kunne være ulovlig. Likevel ga
    nettsiden detaljert veiledning om hvordan programvaren skulle
    installeres og brukes. Nettsiden ble jevnlig oppdatert og
    vedlikeholdt.

    Retten er ikke enig med de begjærende parter i at nettsiden bare
    inneholdt en generell omtale av programvaren. Nettsiden synes å ha
    oppfordret til, tilrettelagt for og bidratt til muligheter for økt
    bruk av programvaren i det norske marked. Etter en samlet vurdering
    er retten derfor kommet til at det foreligger skjellig grunn til
    mistanke om et straffbart forhold, nærmere bestemt medvirkning til
    overtredelse av åndsverkloven § 2, jf. lovens § 54 første ledd
    bokstav a og straffeloven § 15.

  Den siterte skildringa gjev inntrykk av at tingretten ser på sjølve
  programvara som ulovleg. Det er ingenting i grunngjevinga som drøfter
  forholdet mellom popcorn-time.no og gjerningane til
  hovudpersonen. Dette gjer det vanskelegare å sjå på kva måte
  tingretten meiner at popcorn-time.no medverker til ulovleg
  tilgjengeleggjering av opphavsrettsbeskytta materiale.

  I norsk rett er det vanleg å snakke om tre former for medverking:
  Fysisk, psykisk, og «passiv» (medverking i form av unnlating).
  Tingretten si skildring sitert over gjer grunn til å drøfte kva for
  alternativ som kan vere aktuelt.

  Det kan ikkje vere tale om fysisk medverking i denne saka. Popcorn
  Time er ei programvare med lovleg teknologi og mange lovlege
  bruksområde. Programvara er samanliknbar med verktøy som
  datamaskiner, telefonar, nettlesarar eller USB-kablar. Alle desse
  verktøya kan potensielt brukast til forskjellige kriminelle
  handlingar, for eksempel framsetting av truslar eller overføring av
  opphavsrettsbeskytta materiale. Det gjer likevel sjølvsagt ikkje
  verktøya ulovlege. Å tilby og informere om slike verktøy kan difor
  ikkje utgjere straffbar medverking, og det same gjeld for Popcorn
  Time.

  Neste alternativ er om det ligg føre psykisk medverking. Med psykisk
  medverking tenkjer ein på tilfelle der «tiltalte positivt har
  tilskyndet til handlingen eller styrket gjerningspersonens forsett»,
  jf. Rt. 2014 s. 930 avsnitt 11.

  Spørsmålet blir om popcorn-time.no ved å gi informasjon og lenke til
  programvara Popcorn Time, kan seiast å ha positivt tilskynda til
  (oppfordra til) ulovleg spreiing av opphavsrettsbeskytta materiale,
  eller styrka forsettet til gjerningspersonen til å foreta slik
  spreiing.

  NUUG kan ikkje sjå at det låg føre nokon oppfordringar av noko slag
  på popcorn-time.no til ulovleg deling av opphavsrettsbeskytta
  materiale. Nettsida oppfordrar og gir rettleiing i bruk av Popcorn
  Time, men ga ingen spesifikk informasjon om opphavsrettsbeskytta
  materiale eller oppfordra på nokon måte til slik bruk av
  programvara. Tvert derimot innehaldt sida følgjande tekst, nettopp
  for å hindre misbruk av programvara:

    Før du fortsetter, bør du være klar over at bruk av Popcorn Time og
    lignende kan være ulovlig. Mye av innholdet i disse tjenestene er
    opphavsrettsbeskyttet materiale som deles og lastet ned uten
    tillatelse fra eierne og produsenter av materialet. Bruk av disse
    tjenestene vil ofte resultere i et brudd på opphavsrett, avhengig av
    hva du ser. Hvis du likevel velger å bruke tjenestene du lese om på
    dette området, gjør du det på egen risiko, og det anbefales å følge
    loven. (vår utheving og understreking)

  Det låg altså ikkje føre nokon positiv tilskynding, men derimot
  positiv oppfordring til å avstå frå ulovleg bruk av Popcorn Time.

  Det siste alternativet er om det ligg føre straffbar medverking i
  form av passivitet.

  Den klare hovudregelen i norsk rett er at passivitet frå medverkeren
  ikkje kan gi grunnlag for straff. Passivitet kan berre medføre
  straffansvar dersom den passive har eit særleg band til saka, og
  soleis har ei særleg plikt til å forhindre den straffbare handlinga.

  I denne saka står popcorn-time.no i alle høve for langt frå dei
  straffbare handlingane til at ansvar for passiv medverking kan vere
  aktuelt. Den ulovlege delinga skjer ikkje gjennom popcorn-time.no.
  Nettsida har ingen kontroll med kven som lastar ned programvara, og
  ikkje kva programvara brukast til. Dersom det skulle vere medverking å
  berre informere om programvara slik popcorn-time.no gjorde, følgjer
  det logisk at ein kvar som informerer om lovlege produkt som har eit
  potensiale for misbruk, kan hamne i straffansvar. Norsk strafferett
  bygger ikkje på eit så strengt ansvar for medverking.

  Det avgjerande i tvilstilfeller om medverking, er straffverdigheita av
  den aktuelle atferd og preventive omsyn. Som det er argumentert for
  over, er bruk av og informasjon om fri programvare ønskeleg i eit
  moderne, teknologidrive samfunn. Det er lite straffverdig i det å
  legge til rette for dette. NUUG ser ikkje heilt vekk i frå at
  DNS-domenebeslag kan vere eit aktuelt tvangsmiddel mot domene som
  positivt oppfordrar til lovbrot. Popcorn-time.no er derimot ikkje eit
  slikt domene.

                                 .....

  4. AVSLUTTANDE MERKNADER

  Då Norwegian Unix User Group opptrer som partshjelpar leggjast det
  ikkje ned sjølvstendig påstand, men det erklæres partshjelp for ankas
  prinsipielle påstand nr 1 og 2, samt dei subsidiære påstandande nr. 1
  og 3.

                                 -o0o-

  Prosesskrivet med bilag er sendt Follo Tingrett i fire – 4 –
  eksemplar.

  I tillegg er to eksemplar sendt motpartens prosessfullmektig.

  Kopi er også sendt elektronisk per e-post.

  Oslo, 7. mars 2017
  Advokatfirmaet Føyen Torkildsen AS

  Kjetil Wick Sætre
  Advokatfullmektig
  kws (at) foyentorkildsen.no

Nå venter vi spent på prosessskrivet fra EFN, og respons fra motpart og
domstol.