Det ser ut til at omsetjingsprosjektet for OpenOffice.org får pengar til å tilsetja fleire folk i sommarferien. Det er temmeleg sikkert snakk om eit par nynorskfolk, og sannsynlegvis eit par på bokmål òg. Me sender ut denne meldinga no, slik at dei som er interesserte kan byrja å tenkja på det.

I løpet av sommaren skal omsetjingane på bokmål og nynorsk oppdaterast til versjon 1.1 av OpenOffice.org. Me er no komne så langt at det stort sett berre er hjelpetekstane som står att. Dette er ein viktig del av eit fullverdig produkt, men det er store mengder tekst og mykje arbeid. I tillegg til «rett-fram-omsetjing» av tekst, vil arbeidet krevja forståing av funksjonaliteten til programmet. Det hender ofte at hjelpetekstar må omformulerast før det blir god norsk av dei. Arbeidet er difor variert og utfordrande.

Som omsetjar må du vera stødig i rettskriving. Det er òg ein fordel å vera van med bruk av data. Omsetjarane har kontorplass i Oslo sentrum hos Akershus fylkeskommune.

Dersom du er interessert, kan du melda di interesse på e-postlista eller direkte til meg.

Med helsing, Gaute Hvoslef Kvalnes www.openofficeorg.no